Short Description

محبت تو سمندر ہے نجمہ جبین کا ایک جذباتی اور معاشرتی اردو ناول ہے جو روشنہ جہانگیر اور اسجد کے جبری نکاح، خاندانی دشمنی، انتقام، بداعتمادی، مردانہ انا اور نفرت سے محبت تک پہنچنے والے پیچیدہ سفر کی داستان پیش کرتا ہے۔

Forced marriage, revenge, possessive hero, strong heroine aur hate to love romance par mabni aik intense complete Urdu novel.

جبر، انا اور نفرت کے درمیان جنم لیتی ایک گہری محبت کی داستان۔

کس کو فون کر رہی تھیں؟” پوچھنے کا انداز مشکوک تھا۔ پہلے تو وہ گڑبڑائی، پھر جانے کیسے خود اعتمادی لوٹ آئی۔ “مما سے بات کرنی تھی۔” “کیوں؟” اسجد نے ریسیور اس کے ہاتھ سے چھینتے ہوئے سخت لہجے میں سوال کیا۔ “بس میری مرضی۔” اس کے بے نیاز انداز پر وہ جیسے سلگ اٹھا۔ “یہاں آپ کی کوئی مرضی نہیں چل سکتی، محترمہ! کان کھول کر سن لیں، میری اجازت کے بغیر کوئی من مانی نہیں کر سکتیں تم۔” چبا چبا کر روشنی سے کہتے ہوئے اس نے لمحے کی تاخیر کیے بنا فون لاک کر دیا۔ “تم ایسا نہیں کرو گے، مجھے مما سے بات کرنی ہے، لاک کھولیں۔” غصے کی شدت سے پاگل ہوتی روشنی اس پر جھپٹی اور ریسیور چھیننے کی کوشش کرنے لگی۔ اس کی اس جرات اور یوں الجھنے پر اسجد کی آنکھوں میں شرارے سلگ اٹھے۔ مارے غیظ و غضب کے ریسیور کریڈل پر پھینکا اور چیختی چلاتی روشنی کو بازو سے پکڑ کر گھسیٹتا بیڈ روم میں لے آیا، اور انتہائی جنونی انداز میں اسے بیڈ پر دھکیل کر کمرے کو اندر سے لاک کر دیا۔ غصے کی شدت سے کھولتے ہوئے وہ دوبارہ اس کی طرف پلٹا، تو بیڈ پر گری روشنی اس کی آنکھوں میں وحشتیں امڈتی دیکھ کر ساری بہادری اور دلیری بھلا کر اندر ہی اندر لرز گئی۔ جانے وہ اب اس کے ساتھ کیا رویہ روا رکھے، اس تنہا کمرے کی چار دیواری میں وہ ایک کمزور اور بے بس لڑکی اس سنگدل کے رحم و کرم پر تھی۔ “ہوں، اب بتاؤ کیا چاہتی ہو تم؟ میرے منع کرنے کے باوجود فون کو تم نے ہاتھ کیوں لگایا؟” وہ ایک دم اپنی ساری کوفت اور غصہ بھول کر ڈری سمٹی روشنی کو دلچسپی سے دیکھنے لگا، جو اس اکیلے کمرے میں اس کی موجودگی سے بے حد خائف اور ہراساں دکھائی دے رہی تھی۔ کہاں گئی تھی ساری تیزی و طراری اور دلیری؟ جانے اس وقت کہاں چھپ گئی تھی۔ اس کی اڑی اڑی سی رنگت، گھبرائے گھبرائے سندر چہرے پر پھیلا خوف و ہراس، وہ جیسے اپنا آپ بھلائے ایک ٹک اسے دیکھتا چلا گیا۔ جانے کب اور کیسے ایک لرزتے لمحے کی زد میں آ کر دل کے دریچے وا ہوئے اور وہ اکھڑی، بے نیاز لڑکی دل میں مقید ہوتی چلی گئی۔ کیا محبت اس کو کہتے ہیں؟ آگہی کا سحر انگیز لمس اسے پل بھر کو بے چین کر گیا۔ “تم مجھے اس حبسِ بے جا میں نہیں رکھ سکتے۔ میں مما کو فون کر کے تمہارے اس کارنامے سے آگاہ کرنا چاہتی ہوں، وہ میرے لیے اپ سیٹ اور بے حد پریشان ہوں گی۔” اسے یوں ایک ٹک اپنی طرف متوجہ دیکھ کر وہ سٹپٹا کر اٹھ کھڑی ہوئی اور فون کرنے کا جواز بتانے لگی کہ شاید اس پر کوئی اثر ہو جائے۔ “کیوں، کس کی اجازت سے تم اپنی والدہ محترمہ کو فون کر رہی تھیں؟ اچھا ہے وہ اپ سیٹ اور پریشان ہوں، انہیں پتا چلے کہ اپنوں سے جدا رہ کر کیسے جیا جاتا ہے۔ جہاں تک حبسِ بے جا کی بات ہے تو روشنی بیگم! تم بھول رہی ہو کہ تمہارا اور میرا کیا تعلق ہے۔ منکوحہ ہو میری، جس کا سب سے بڑا ثبوت نکاح نامہ ہے۔ چاہے اس کی تم ساری دنیا میں تشہیر کر دو، مجھے پروا نہیں۔ میں نے تو صرف اپنا قانونی اور شرعی حق استعمال کیا ہے۔” اسجد نے قریب آ کر بلا جھجک انداز میں اس کے شانوں پر ہاتھ رکھتے ہوئے بے خوفی سے اپنے حق کا دفاع کیا۔ اس کے چبھتے انداز میں بے رحمی، لاپرواہی اور بے نیازی بھی تھی، جسے محسوس کر کے روشنی سرتاپا کھول اٹھی۔ “خوش فہمی ہے تمہاری، میں ایسے کسی تعلق کو نہیں مانتی جس میں میری ذاتی مرضی اور رضا شامل نہ ہو۔” اس نے تنک کر اپنا آپ اس کی گرفت سے آزاد کرانے کی کوشش کی۔ “جانتا ہوں، تم وہی قدم اٹھانا چاہو گی جو تمہاری ماں نے اٹھایا تھا۔ جن عورتوں کو گھر اور شوہر سے محبت نہ ہو وہ ایسی ہی ہوتی ہیں، مگر تم بھی ذہن نشین کر لو روشنہ جہانگیر! کہ میں تمہاری دل کی خواہش کو پایۂ تکمیل تک نہیں پہنچاؤں گا۔ جو تم چاہتی ہو وہ نہیں ہونے دوں گا، تم میری بیوی ہو اور دنیا کا کوئی فرد اس سچائی کو نہیں جھٹلا سکتا۔” اس کی شعلہ صفت نگاہوں میں بے حسی سمٹ آئی تھی، لہجہ پرعزم اور چٹانوں جیسا مضبوط تھا۔ وہ اس کے بے حد قریب کھڑی تھی، اتنی قریب کہ اس کی قربت روشنی کے وجود کو پگھلانے لگی تھی، مگر وہ اپنے طور پر کسی طرح بھی کمزور پڑ کر اس کے سامنے ہتھیار نہیں ڈالنا چاہتی تھی، تب ہی تو اس کی بات پر بھڑک اٹھی۔ “میری ماں کا نام لینے اور ان پر کیچڑ اچھالنے کا تمہیں کوئی حق نہیں، اسجد صاحب! مجھ پر زیادتی کر کے اگر تم یہ سمجھتے ہو کہ تم فاتح بن گئے ہو تو یہ تمہاری بھول ہے۔ جبر اور ستم کے ذریعے تم جسمانی طور پر تو مجھے توڑ سکتے ہو، مگر میرے دل تک تو شاید کبھی رسائی حاصل نہ کر سکو گے، یہ آپ بھی یاد رکھیں۔” اپنا آپ ایک جھٹکے سے اس کی گرفت سے آزاد کرتے ہوئے اس نے تحقیرانہ انداز میں گویا نشتر زنی کی “یہ مت بھولو روشنہ جہانگیر کہ اس وقت تم میرے رحم و کرم پر اور میری دسترس میں ہو، تم بار بار میری مردانگی کو مت آزماؤ، کہ کسی مرد کے لیے عورت کو زیر کرنا مشکل نہیں، جس کا ثبوت میں شبِ اول دے چکا ہوں، مگر اب ایسا نہیں ہوگا۔ سبق دینے کے لیے وہ سزا کافی ہے، اب یہ تعلق، یہ رشتہ تب پروان چڑھے گا جب تم خود سارے فاصلے مٹا کر میری طرف بڑھو گی