Short Description

زندگی دھوپ تم گھنا سایہ حنا ملک کا ایک جذباتی، سنسنی خیز اور انتقام پر مبنی اردو ناول ہے جو ماہا، زعیم حسن اور رمنا درانی کے درمیان ماضی کے راز، عمر کے فرق، استاد اور طالبہ کی محبت اور مکافاتِ عمل کی پیچیدہ کہانی بیان کرتا ہے۔۔

Revenge, teacher student romance, age gap aur family secrets par mabni aik intense emotional complete Urdu novel.

خاموش محبت، غلط فہمیوں اور قربانی سے گزرتی ایک دل ہلا دینے والی داستان۔

سر!۔۔۔ مما میری شادی کرنا چاہتی ہیں۔“ افسردہ سے لہجے میں کہتی سیدھی دل میں اتر گئی۔ ”میں۔۔۔ میں ایسا نہیں چاہتی۔“ یک دم وہ چہرہ دونوں ہاتھوں میں چھپا کر رو پڑی۔ زعیم حسن نے نچلا لب دانتوں تلے دبا کر ایک گہری نگاہ روتی ہوئی ماہا پر ڈالی۔ کرسی کی پشت سے سر ٹکا کر وہ چند ثانیے اسے یوں ہی دیکھتا رہا۔ پھر اٹھ کر اس کے پاس آ کھڑا ہوا۔ ”رونے والے بزدل ہوتے ہیں ماہا۔“ اس کے کندھے پر ہاتھ رکھتے ہوئے وہ گویا ہوا۔ ”م۔۔۔ مجھے بتائیے سر! میں۔۔۔ میں کیا کروں؟ مما تو اسی ہفتے میرا نکاح کر رہی ہیں۔“ ”تم صاف انکار کر دو۔“ ”جی۔۔۔“ ماہا نے روتے روتے سر اٹھا کر اس کی طرف دیکھا۔ ”مگر کیسے؟“ ”صاف کہہ دو کہ تم کسی اور کو پسند کرتی ہو۔“ ”کیا آپ۔۔۔ نہیں کرتیں؟“ لہجہ اتنا مضبوط تھا کہ ماہا بے اختیار نظریں جھکا کر رہ گئی۔ ”مما مجھے جان سے مار دیں گی۔“ ”محبت تو انسان کو نڈر بناتی ہے جبکہ آپ ابھی سے حوصلہ ہار گئیں۔“ زعیم حسن نے کہا۔ ”آپ بے خوف ہو کر اپنی مما سے بات کیجیے۔ وہ ماں ہیں آپ کی۔ جان سے نہیں ماریں گی۔ یہ گارنٹی میں دیتا ہوں۔ ہو سکتا ہے کچھ خفگی وغیرہ دکھائیں مگر وہ بالآخر مان جائیں گی۔“ وہ کہہ رہا تھا۔ کن اکھیوں سے ماہا کی طرف دیکھا جو سر جھکائے لب کاٹتی تذبذب کا شکار لگ رہی تھی۔ ”آپ بے فکر ہو کر جائیے ماہا! میں ہوں ناں پھر کاہے کا ڈر؟“ اسے شانوں سے تھام کر مقابل کرتے ہوئے تسلی دی۔ ”آپ کی مما ضرور مان جائیں گی۔ ریلیکس۔“ ”تھینک یو سر!“ آنکھوں میں چمک لوٹ آئی تھی اور لبوں پر دھیمی سی مسکان بکھر گئی تھی۔ وہ کمرے سے نکل گئی۔ زعیم نے ہاتھ میں پکڑا سگریٹ ایش ٹرے میں مسل دیا تھا۔ ۔۔۔۔۔۔۔۔۔۔۔ مجھے نہیں دیکھنی کوئی تصویر ماہا!“ مما کا بڑھا ہوا ہاتھ جھٹک دیا تھا۔ وہ تو اس قدر بدتمیزی پر کھول کر رہ گئی تھیں۔ ”یہ کیا بیہودگی ہے ماہا؟“ ”جب سب کچھ آپ طے کر چکی ہیں تو پھر مجھے تصویر دکھانے کی فارمیلٹی کیوں نبھا رہی ہیں؟“ ماہا نے اس طرح پہلے بھی بات نہیں کی تھی۔ مسز درانی نے بڑی شدت سے اس کے بے خوف لہجے کو محسوس کیا تھا۔ درپردہ کوئی اور تھا جو ماہا کی ہمت بڑھا رہا تھا۔ جس کی شہہ پر ماہا آج ان کے سامنے اس طرح بول رہی تھی۔ وہ لڑکی جو کل تک اپنی کسی فرینڈ کے گھر جانے سے پہلے یا کوئی ڈریس خریدنے سے پہلے مما سے سو بار پوچھتی تھی، آج اتنی خودسر ہو گئی تھی کہ ماں کے سامنے آ کھڑی ہوئی تھی۔ ”کون ہے وہ؟“ مما تھکے تھکے سے انداز میں کہتی صوفے پر بیٹھ گئیں۔ ”جی؟“ ماہا نے چونک کر دیکھا۔ ”اتنی انجان مت بنو۔ وہی جس کی شہہ پر آج اپنی ماں کے منہ آ رہی ہو۔“ ”زعیم حسن۔“ ماہا نے سر جھکا کر گویا اپنے جرم کا اعتراف کیا۔ ”تمہارے ساتھ پڑھتا ہے؟“ ”نہیں۔“ ”تو پھر۔۔۔“ ”میرے ٹیچر ہیں۔“ ”واٹ؟ وہی جو اس روز تمہیں چھوڑنے آئے تھے؟“ ”جی۔“ ”تمہارا ٹیچر ہے! کیا عمر ہے؟ دیکھنے میں تو ینگ ہیں ؟ ٹیچر ہے تو عمر میں تو تم سے تو اوپر کا ہی ہوگا۔“ ”شاید۔۔۔“ وہ مسلسل سر جھکائے کھڑی تھی۔ ”تمہیں شرم نہیں آئی ماہا! اپنے سے اتنی بڑی عمر کے شخص کے ساتھ؟ تمہارا دماغ تو نہیں چل گیا۔“ وہ ایک دم بھڑک اٹھی تھیں۔ ”محبت عمروں سے مشروط نہیں ہوتی۔“ جی کڑا کر کے کہہ ڈالا۔ ”شٹ اپ۔ میں نے تمہیں یہاں پڑھنے کے لیے بھیجا تھا۔ محبت پیار کے چکروں میں پڑنے کو نہیں۔“ ”آپ کچھ بھی کہیں۔ میں شادی کروں گی تو صرف زعیم حسن سے۔“ اس کا انداز ہٹ دھرم تھا۔ ہمیشہ فیصلے سنا کر ان پر مہرِ ثبت کرنے والی مما آج بے بس نظر آ رہی تھیں۔ ”اس سے کہو مجھ سے آ کر ملے۔“ وہ کمرے سے نکلنے لگی تھی جب اس نے مما کی آواز سنی تھی۔ ”تھینک یو مما! تھینک یو سو مچ!“ مما کے سامنے دو زانو بیٹھ کر ان کے ہاتھ تھام کر کہا۔ لنچ کے بعد مما کو کسی میٹنگ کے لیے جانا تھا۔ مما کے جانے کے بعد وہ زعیم حسن سے ملنے چل پڑی تھی۔ ’پتہ نہیں گھر پر ہوں گے بھی یا نہیں۔‘ اس کے اپارٹمنٹ کی طرف بڑھتے ہوئے سوچا۔ تین بار بیل بجانے کے بعد دروازہ کھل گیا۔ بلیک پینٹ اور بلیک لائنوں والی گرے کلر شرٹ میں وہ بلا کا جاذبِ نظر لگ رہا تھا۔ یا شاید ماہا کو آج وہ کچھ زیادہ ہی اچھا لگ رہا تھا۔ ”ہم۔۔۔ کیا نظر لگانے کا ارادہ ہے؟“ زعیم حسن کے کہنے پر وہ شرمندہ سی ہو گئی۔ زعیم نے ایک طرف ہو کر اسے اندر آنے کا راستہ دیا۔ ”سب خیریت رہی؟“ کھوجتی ہوئی نگاہوں سے اس کی طرف دیکھا۔ ”مما اتنی آسانی سے مان جائیں گی، میں نے تو سوچا بھی نہ تھا۔“ خوشی اس کے انگ انگ سے پھوٹی پڑ رہی تھی۔ زعیم کے لبوں پر دھیمی سی مسکراہٹ بکھر گئی۔ ”مما آپ سے ملنا چاہتی ہیں۔“ صرف نظریں اٹھا کر اس کی طرف دیکھا تھا۔ ”کیوں؟“ زعیم کے ’کیوں‘ پر ماہا نے سوالیہ نگاہوں سے اس کی طرف دیکھا تھا۔ ”کیا آپ نہیں جانتے؟“ لہجے میں ہلکی سی ناراضگی در آئی۔ ”جانتا ہوں اور میں تو خود ان سے ملنے کو بے قرار ہوں۔“ ماہا کے چہرے پر جھولتی لٹ کو بائیں ہاتھ سے کان کے پیچھے اڑسا تھا۔ ماہا جھجک کر پیچھے ہوئی۔ جھجکنے اور سمٹنے کے انداز شوق کو مزید ہوا دیتے ہیں۔ زعیم حسن کی شخصیت پرت در پرت کھل رہی تھی۔ بلا کی سنجیدگی اب بے تکلفی کی طرف بڑھ رہی تھی۔ اس نے بھلا یہ سب پہلے کہاں دیکھا تھا۔ کسی مرد سے راہ و رسم کا بالکل پہلا تجربہ تھا۔ وہ گھبرا سی گئی۔ وہ بہت قریب بیٹھے تھے۔ ”آپ بتائیں کب ملوا رہی ہیں اپنی مما سے؟“ ”جب آپ کہیں۔“ ”تو پھر ایسا ہے کہ کل ہی یہ نیک کام کر لیتے ہیں۔ آپ ان سے پوچھ کر مجھے بتا دیجیے گا کہ وہ کہاں ملنا پسند کریں گی۔“ ”۔۔۔ میں اب چلتی ہوں۔“ وہ اٹھنے لگی تو زعیم نے وہی بازو اس کے کندھوں پر رکھ دیا جو صوفے کی بیک پر دھرا تھا۔ ”اتنی جلدی؟“ ماہا پوری جان سے لرز گئی۔ زعیم حسن تو آج اسے حیران کرنے پر تلے تھے۔ ”وہ۔۔۔ مما۔۔۔“ الفاظ حلق میں اٹکنے لگے تھے۔ ”کیا بہت خوفناک ہیں آپ کی مما؟“ ”ن۔۔۔ نہیں تو۔“ ”آپ کے انداز سے تو یہی لگتا ہے۔ لگتا ہے کل مجھے خوب تیاری کر کے ان سے ملنا پڑے گا۔ کیوں، ٹھیک کہہ رہا ہوں نا؟“ اس سے تائید چاہی تو وہ محض مسکرا کر رہ گئی۔ ”مما کو کس طرح امپریس کرنا ہے۔ یہ سوچنا اب آپ کا کام ہے۔“ ”جب بیٹی کو امپریس کر لیا تو مما کیا چیز ہیں۔“ وہ مسکرایا تو ماہا بھی مسکرا دی۔ ”میں جاؤں؟“ ماہا نے فون کر کے زعیم کو گھر بلایا تھا۔ دوپہر کے تین بجے وہ آیا تھا۔ زعیم کو ڈرائنگ روم میں بٹھا کر وہ مما کو بلانے دوڑی تھی۔ ”تم یہی رکو۔ جب ضرورت ہوگی میں بلوا لوں گی۔“ مما نے اسے اپنے کمرے میں رکنے کا کہا تو وہ منہ بنا کر رہ گئی۔ مما جب ڈرائنگ روم میں داخل ہوئیں تو زعیم کی اس کی طرف پشت تھی۔ وہ دیوار پر لگی پینٹنگ دیکھنے میں محو تھا۔ مسز درانی نے کھنکھار کر اپنی آمد کا اعلان کیا۔ زعیم حسن چونک کر پلٹا۔ ”تم۔۔۔“ زعیم حسن کے چہرے پر نظر پڑتے ہی مسز درانی کے منہ سے نکلا تھا۔ ”یادداشت تو ابھی بھی کمال کی ہے آپ کی۔“ اس کے برعکس وہ بے حد پرسکون تھا۔ کوئی دھچکا نہیں لگا تھا۔ ”تم۔۔۔“ الفاظ حلق میں اٹک گئے تھے۔ ”ناچیز کو ہی زعیم حسن کہتے ہیں۔“ ”گیٹ لاسٹ فرام ہیئر ۔“ یکلخت وہ چلائی تھیں۔ زعیم کے لبوں پر استہزائیہ مسکراہٹ دوڑ گئی۔ ”اتنا غصہ؟“ ”تم گھٹیا، کمینے انسان، تمہاری ہمت کیسے ہوئی میری بیٹی کی طرف دیکھنے کی؟“ مسز درانی کے چلانے پر وہ اسی پرسکون سے انداز میں مسکرا دیا۔ ”بہت تکلیف ہو رہی ہے رمنا بیگم؟ تم نے تو کہا تھا کہ تم مجھ جیسے کم ذات اور تمہارے ہی ٹکڑوں پر پلنے والے انسان پر تھوکنا بھی پسند نہیں کرتیں، مگر دیکھو آج اسی کم ذات کو تمہاری بیٹی نے بطور جیون ساتھی پسند کیا ہے۔“ ”اس کا مطلب۔۔۔ تم۔۔۔ تم جانتے تھے کہ ماہا میری بیٹی ہے۔“ ”بہت پہلے سے۔“ ”اوہ تم فراڈیئے! تم نے جان بوجھ کر میری بیٹی کے ساتھ یہ کھیل کھیلا؟“ ”یہی سمجھ لو۔“ ”میں۔۔۔ میں اسے سب کچھ بتا دوں گی۔ تمہارا اصلی چہرہ دکھاؤں گی۔ اسے۔۔۔“ ”پھر تو تم کہیں کی بھی نہیں رہوگی رمنا درانی! جانتی ہو خود اپنی بھی نہیں۔“ وہ بہت پرسکون انداز میں ٹانگ پر ٹانگ چڑھائے صوفے پر بیٹھا تھا جبکہ رمنا سخت بے قراری کے عالم میں ادھر ادھر ٹہل رہی تھیں۔ ”سوچو! کیا بیتے گی اس پر یہ جان کر کہ اس کی ماں کتنی گھٹیا عورت ہے۔“ ”بلیک میل کر رہے ہو مجھے؟“ ”میری مجال؟ یہ تو مکافاتِ عمل ہے۔“ ”میں۔۔۔ میں مر کر بھی ماہا کی شادی تم سے نہیں کروں گی۔“ ”چیلنج کر رہی ہو؟“ اس کا انداز ایسا تھا کہ رمنا تڑپ کر رہ گئیں۔ وہ جانتی تھیں کہ زعیم حسن بدلے کی آگ میں جھلس رہا تھا۔ وہ کچھ بھی کر سکتا تھا۔ ”تمہیں شرم نہیں، اپنے سے بیس برس چھوٹی لڑکی کو پھنساتے ہوئے۔“ ”تمہیں شرم آئی تھی خود سے چھ برس چھوٹے لڑکے کو پھنساتے ہوئے؟ میں تو پھر مرد ہوں۔“ وہ بدو بدو بولا تھا۔ ”میں۔۔۔ میں تمہیں کبھی جیتنے نہیں دوں گی۔“ ”عرصہ ہوا ہار جیت کا کھیل چھوڑ دیا۔ ہم تو صرف ایک ہی کھیل کھیلا کرتے ہیں۔ بدلے کا کھیل، انتقام کا کھیل۔“ وہ ہنوز پرسکون تھا۔