Short Description

تمہارے واسطے جاناں نسرین نکہت سبزواری کا ایک جذباتی اور دل کو چھو لینے والا اردو ناول ہے جو دعا اور رحمان صاحب کے درمیان عمر کے فرق، تحفظ، اعتماد، نکاح اور خاموش محبت کے خوب صورت سفر کو بیان کرتا ہے۔

Dua ke liye yeh nikah sirf aik mehfooz chhat nahi tha, balki izzat aur apnayat ki pehli umeed bhi tha. Parhiye Nasreen Nikhat Sabzwari ka complete romantic Urdu novel Tumhare Waste Jana.

تحفظ، اعتماد اور عمر کے فاصلے کے درمیان جنم لیتی ایک خاموش محبت کی خوب صورت داستان۔

ہم دونوں نکاح کر لیں گے اور دنیا کی نظروں میں میاں بیوی کی حیثیت سے رہیں گے، لیکن حقیقت میں نہیں، آپ میرے ہاں رہ کر اپنی تعلیم مکمل کریں گی اور جب چاہیں گی مجھ سے کنارہ کش ہو جائیں گی۔ ’تو رحمان صاحب، آپ نے بھی ظاہر کر دیا کہ آپ مجھے اپنے قابل نہیں سمجھتے۔ عمر کا تو محض بہانہ ہے۔ ظاہر ہے ایک سرمایہ دار اور ذی حیثیت شخص ایک تہی دست اور بے نام و نشان، بے مایہ لڑکی سے ساری عمر کے لیے ناتا کیسے جوڑ سکتا ہے۔ یہی کیا کم ہے کہ وہ اسے اتنا بڑا سہارا دے رہے ہیں، کچھ عرصے کے لیے ہی سہی ❤️❤️❤️ ”دعا، مجھے یہ کہنے میں کوئی عار نہیں کہ آپ ایک آئیڈیل لڑکی ہیں، کوئی بھی سمجھدار آدمی آپ کو اپنانے میں فخر محسوس کرے گا۔ یقین کیجیے یہ بات میں دل کی گہرائیوں سے کہہ رہا ہوں، لیکن قباحت یہ ہے کہ میری اور آپ کی عمروں میں فرق بہت زیادہ ہے۔ میرا خیال ہے کہ لڑکیاں ہمیشہ نوجوان اور ہینڈسم جیون ساتھی کے خواب دیکھتی ہیں اور میں نہ ہینڈسم ہوں اور نہ نوجوان، لیکن پھر بھی میں نے میڈم شبنم کے چیلنج کو قبول کر لیا ہے تاکہ میں دکھا سکوں کہ آپ واقعی ایک بہترین لڑکی ہیں۔ دوسری بات یہ ہے دعا کہ میں بحیثیت ایک دوست اور خیر خواہ کے آپ کو دوبارہ حالات کے حوالے نہیں کر سکتا۔ کیا کیا جائے، ہمارا معاشرہ ہی اس قابل نہیں ہے۔ اب ان دونوں مسائل کا ایک درمیانہ حل میرے پاس موجود ہے۔“ وہ سر جھکائے ان کی باتیں سن رہی تھی اور آنکھوں سے چپ چاپ آنسو بہہ رہے تھے۔ رحمان صاحب نے اس کی طرف دیکھا اور پھر اپنی بات شروع کی۔ ”وہ حل یہ ہے کہ ہم دونوں نکاح کر لیں گے اور دنیا کی نظروں میں میاں بیوی کی حیثیت سے رہیں گے، لیکن حقیقت میں نہیں، آپ میرے ہاں رہ کر اپنی تعلیم مکمل کریں گی اور جب چاہیں گی مجھ سے کنارہ کش ہو جائیں گی۔ میرے گھر میں اہل خانہ نہیں ہیں لیکن مخلص اور ہمدرد ملازم بہت ہیں، خاص طور سے ہوا نصیبن کی موجودگی میں آپ تنہائی محسوس نہیں کریں گی۔“ رحمان صاحب نے بات ختم کر کے یوں گہرا سانس لیا جیسے اب تک سانس سینے میں اٹکا ہوا تھا۔ دعا نے اب بھی کچھ نہ کہا، وہ سوچ رہی تھی۔ ’تو رحمان صاحب، آپ نے بھی ظاہر کر دیا کہ آپ مجھے اپنے قابل نہیں سمجھتے۔ عمر کا تو محض بہانہ ہے۔ ظاہر ہے ایک سرمایہ دار اور ذی حیثیت شخص ایک تہی دست اور بے نام و نشان، بے مایہ لڑکی سے ساری عمر کے لیے ناتا کیسے جوڑ سکتا ہے۔ یہی کیا کم ہے کہ وہ اسے اتنا بڑا سہارا دے رہے ہیں، کچھ عرصے کے لیے ہی سہی، وہ معاشرے میں معتبر ہو جائے گی، ایک محفوظ چھت مل جائے گی، زمانے کے سرد گرم سے پناہ مل جائے گی۔ اس کے بعد کیا ہو گا، جو قسمت دکھائے گی دیکھ لوں گی، اگر تعلیم مکمل ہو گئی تو شاید زندگی کچھ بااعتبار ہو جائے۔‘ رحمان صاحب نے اس کی جھکی ہوئی گردن کو دیکھا۔ ”لیکن بخدا یہ صرف اور صرف آپ کی مرضی پر رہے گا، آپ کی رضا کے بغیر کچھ نہیں ہو گا۔ اگر آپ مجھے ایک شریف انسان سمجھتی ہیں تو یقین رکھیے گا جب تک آپ اس گھر میں رہیں گی، آپ کی عزت و ناموس پر کوئی حرف نہیں آئے گا۔ ہم ایک چھت کے نیچے رہیں گے لیکن صرف دو دوستوں کی طرح، اور جو کچھ آپ چاہیں گی وہی ہو گا، یہ میرا آپ سے وعدہ ہے، میں آپ کی زندگی میں ہرگز مداخلت نہیں کروں گا۔“ دعا اب بھی خاموش تھی۔ ”آپ اچھی طرح سوچ لیجیے۔ میں کل پھر آؤں گا اور جو بھی فیصلہ آپ کریں گی وہی حرفِ آخر ہو گا، کوئی بات ناگوارِ خاطر گزری ہو تو معافی چاہتا ہوں اور ہاں، رات کو آپ کی حفاظت کے لیے ایک چوکیدار آ جائے گا۔“ یہ کہہ کر وہ جانے لگے لیکن دعا نے ہاتھ اٹھا کر انہیں روک لیا۔ ”رحمان صاحب، آپ جیسے عظیم اور ہمدرد دوست کی بات کو میں رد کیسے کر سکتی ہوں، جبکہ اس میں نقصان سراسر آپ کا ہے۔ آپ ایک باعزت اور ذی حیثیت انسان ہیں، میرا کیا ہے، دنیا کی ٹھکرائی ہوئی ایک بے نام سی لڑکی ہوں، آج مر جاؤں تو کل کسی کو میرا نام یاد بھی نہیں رہے گا، پھر بھی میری ایک چھوٹی سی شرط ہے، اگر آپ کو ناگوار نہ گزرے تو…“ رحمان صاحب رک گئے۔ ”اپنے آپ کو ایسا نہ کہیے دعا، آپ میری نظروں میں کسی باعزت اور باوقار لڑکی سے کسی طرح کم نہیں۔ برائی تو ان لوگوں میں ہے جنہیں انسان کی پرکھ کا سلیقہ ہی نہیں ہے۔ خیر، آپ اپنی شرط بتائیے۔“ ”شرط نہیں اسے التجا سمجھ لیجیے کہ یہ نکاح صرف دکھاوے کے لیے نہیں ہو گا، باقی سب کچھ مجھے منظور ہے اور علیحدگی پر بھی مجھے کوئی اعتراض نہ ہو گا، مجھے کسی قسم کی ضرورت نہیں ہے، مجھے آپ پر مکمل بھروسہ ہے۔“ وہ ایک ہی سانس میں جلدی جلدی کہہ گئی، فرطِ حیا سے اس کا چہرہ سرخ ہو رہا تھا۔ نامعلوم کیوں ایک ہلکی سی مسکراہٹ رحمان صاحب کے لبوں پر ابھری اور معدوم ہو گئی اور چہرے پر ایک رنگ آ کر گزر گیا۔ ”مجھے آپ کی شرط منظور ہے۔“ وہ دھیرے سے کہہ کر باہر نکل گئے، دعا اپنی سوچوں میں گھری بیٹھی رہ گئی، پھر اس کے ہاتھ اٹھے اور ہونٹوں پر ایک خاموش دعا لرزنے لگی۔