ہاں، اس گھر سے تو ضرور جائے گی۔ پر یہ نہیں، تو!” اس کے لفظوں میں سختی زیادہ تھی یا آنکھوں میں سفاکی، وہاں کھڑا کوئی شخص اندازہ نہیں لگا پایا۔ “یہ تم کیا کہہ رہے ہو نیاز؟” حیبہ کو ایک بار پھر لگا کہ شاید اسے سننے میں غلطی ہوئی ہے مگر ایک بار پھر وہ خود ہی غلط ثابت ہو گئی تھی۔ “ٹھیک کہہ رہا ہوں میں۔” اس نے حیبہ کو بازو سے پکڑ کر دھکا دیا اور زور سے چلایا۔ “تجھے ذرا شرم نہیں آئی حیبہ یہ سب کرتے ہوئے؟ سب بتا رہی ہے یہ مجھے کہ کیسے تم لوگوں نے اس کا دانہ پانی بند کیا، انور کے ساتھ مل کر اسے مارا، اس سے گھر کے سارے کام کرائے، اتنی زیادتیاں کیں اور اس نے کبھی اف تک نہیں کی۔ ہر بار مجھے اپنا سمجھ کے معاف کیا اور اگر کبھی میں نے کچھ کرنا چاہا تو مجھے بھی روک لیا اس نے، اور تو اسی پر…” وہ انتہائی افسوس سے اسے دیکھ رہا تھا اور حیبہ میں اتنی بھی سکت نہیں تھی کہ سر کو نفی میں ہی جنبش دے لیتی۔ اس کی حالت سے بے خبر نیاز کہتا رہا۔ “بڑے دعوے کرتی تھی نہ تو مجھ سے محبت کے؟ میری خاطر ایک چھوٹا موٹا سمجھوتہ بھی برداشت کرنے کو تیار نہیں تھی، اور تو اتنی کم ظرف نکلی کہ یہ مسکین سی لڑکی بھی برداشت نہ کر سکی۔ تو ابھی اور اسی وقت اپنے بچوں کو لے کر میرے گھر سے نکل جا، میں اور کچھ نہیں سننا چاہتا۔” اپنا فیصلہ سنا کر وہ نفرت سے منہ پھیر کر کھڑا ہو گیا۔ حیبہ تڑپ کر اس کے سامنے آئی۔ “رب کی قسم نیاز، میں جھوٹ نہیں بول رہی۔ مجھے میرے بچوں کی قسم، جو تمہیں میری بات کا یقین نہیں ہے تو بے شک انور سے پوچھ لو۔” حیبہ نیاز کے سامنے رو رہی تھی اور اس کے دل کو کچھ نہیں ہو رہا تھا۔ ضروری تو نہیں کہ ایک چہرہ ہمیشہ ہی پیارا لگے۔ ایک آنسو ہمیشہ ہی بااثر ٹھہرے۔ وقت بدل بھی تو جاتا ہے اور وقت بدل چکا تھا، کیونکہ وہ اس کے آنسو پونچھنے کے لیے آگے نہیں بڑھا تھا۔ “اچھا ہے، اگر سب کچھ اس نے کیا ہے تو تب تم لوگوں نے مجھے کیوں نہیں بتایا؟ تم لوگوں کا اصلی چہرہ میرے سامنے آ چکا ہے، اس لیے اب بہتری اسی میں ہے کہ مزید جھوٹ بولنے یا شگفتہ پر الزام لگانے کے بجائے فوراً دفع ہو جاؤ میرے گھر سے۔ میں شکل بھی نہیں دیکھنا چاہتا تم لوگوں کی۔” وہ بگڑے چہرے اور بگڑے لہجے کے ساتھ انہیں باہر کا راستہ دکھا رہا تھا اور وہ اس کے سامنے ہاتھ جوڑے التجا کر رہی تھی۔ “رب دے واسطے نیاز، اتنا ظلم نہ کرو۔ رات کے اس پہر ہم کہاں جائیں گے؟ وعدہ کرتی ہوں اب تمہیں کوئی شکایت نہیں ہونے دوں گی۔” “میں تیری کوئی بکواس نہیں سننا چاہتا حیبہ! جو کچھ تو نے کیا ہے اس کے بعد بھی میں تجھے صرف گھر سے نکال رہا ہوں، لیکن اگر تو نے ایک بھی لفظ بولا اور یہ گھر نہ چھوڑا تو میں تین لفظ بول کر تجھے بیٹھنے کے قابل بھی نہیں چھوڑوں گا۔”