اوہ مائی گاڈ! آپ کیا کہہ رہی ہیں مما جانی؟ آبگینہ اور میرا رشتہ؟ آپ نے مجھ سے پوچھے بنا ہی اتنا بڑا فیصلہ کر لیا؟ نو وے! میں اور آبگینہ سے شادی کر لوں؟ مما! آپ لوگوں نے ایسا سوچ بھی کیسے لیا؟” اس کے لفظوں کے تیروں نے آبگینہ کو گھائل کر دیا، اس کے قدم لڑکھڑا گئے، اس نے جلدی سے دیوار کا سہارا لیا۔ “یہ تم کیا کہہ رہے ہو شاہ زیب؟” مما جانی حیرانگی سے اسے دیکھنے لگیں۔ “سادہ سی بات ہے مما جانی! جس لڑکی کی حرکتیں میں ایک پل کو برداشت نہیں کر سکتا، کیا اسے ساری زندگی برداشت کر لوں گا؟ نو مام! آپ اچھی طرح جانتی ہیں کہ آبگینہ جیسی لڑکیاں میرا آئیڈیل نہیں بن سکتیں، جو سارا سارا دن اول فول حلیے میں اوٹ پٹانگ حرکتیں کرتی پھریں، جس میں لڑکیوں والی ایک بھی خوبی نہ ہو، نہ لڑکیوں والی شرم و حیا، نہ دھیما اندازِ گفتگو، نہ وقار، بولے تو لگے گویا کسی نے سر میں پٹاخے چھوڑ دیے ہوں، نہیں مما جانی! سوری، میں یہ مفت کا عذاب ساری زندگی کے لیے مول نہیں لے سکتا، مجھے افسوس ہے میں آپ کی خواہش پوری نہیں کر سکتا۔” الفاظ تھے یا نشتر جو دھڑا دھڑ سینے میں پیوست ہوتے چلے گئے۔ وہ اپنے دل کو سنبھالتی، ڈولتے وجود کے ساتھ اپنے کمرے میں چلی آئی۔ صد شکر کہ اسے کسی نے دیکھا نہیں تھا۔ “شاہ زیب! ساری لڑکیاں شادی سے پہلے ایسی ہی ہوتی ہیں مگر جب ذمہ داری سر پر پڑتی ہے تو سدھر جاتی ہیں، پھر آبگینہ تو بہت پیاری بچی ہے، تم ہمارے انتخاب سے کبھی مایوس نہیں ہو گے۔” مما جانی نے اس اڑیل کو منانے کی ایک آخری کوشش کی تھی۔ “آپ جو کہہ رہی ہیں ٹھیک ہی ہوگا مگر مجھے پھر بھی افسوس ہے کہ میں آپ کی بات نہیں مان سکتا، میں پہلے ہی کسی اور سے کمٹمنٹ کر چکا ہوں۔” وہ سپاٹ انداز میں بولا۔ “کون ہے وہ؟” مما جانی افسردگی سے بولیں۔ “میرے کولیگ کی بہن ہے وہ، بالکل ویسی ہے جیسی لڑکی میں چاہتا ہوں، بالکل میرے خیالات سے میل کھاتی ہوئی، آپ دیکھیں گی تو یقیناً آپ کو بھی پسند آئے گی۔” شاہ زیب بڑے جوش سے بتانے لگا۔ “بیٹا جی! جب آپ کمٹمنٹ کر چکے ہیں تو پھر ہمیں پسند آنا یا نہ آنا تو ثانوی بات ہے، ٹھیک ہے، میں تمہارے چاچو اور دادو سے مشورہ کر لوں پھر چلیں گے۔” انہوں نے دکھ کی انتہا پر جاتے ہوئے کہا مگر شاہ زیب اس اندھی سیڑھی پر کھڑا تھا جہاں اسے اپنے پیاروں کے چہرے دکھائی نہیں دے رہے تھے، اس وقت وہ صرف اپنی غرض کے بارے میں سوچ رہا تھا۔ “تھینکس مما جانی! یو آر سو گریٹ۔” وہ خوشی کے مارے ان کے گلے لگتے ہوئے بولا اور پھر اپنی خوشی میں ان کی اداسی کو محسوس ہی نہ کر سکا، مما جانی اس کے جانے کے بعد بیڈ سے ٹیک لگا کر پھوٹ پھوٹ کر رو دیں۔ کتنی خواہش تھی انہیں آبگینہ کو اپنی بہو بنانے کی۔ “کاش جواد عیشاء کے لیے اپنا ارادہ ظاہر نہ کرتا تو میں اسے جواد کے لیے مانگ لیتی۔” وہ دلگرفتگی سے سوچ رہی تھیں۔ آبگینہ اپنے ٹوٹے بکھرے وجود کو سمیٹتی اپنے کمرے میں گھٹتی چلی آئی، آنکھیں بھر بھر آ رہی تھیں، دل تھا کہ دکھ کی اتھاہ میں ڈوبا جا رہا تھا، وہ بمشکل تمام اپنے بیڈ تک پہنچی اور پھر بیڈ پر ڈھے گئی۔ “اتنی تذلیل شاہ زیب حسن! اتنی نفرت؟ تم نے تو مجھے میری ہی نظروں میں گرا دیا، کیا کچھ کہہ دیا! ایک بار، صرف ایک بار میرے دل میں تو جھانکتے، دیکھتے تو سہی کہ اس دل میں تمہارے لیے کتنی جگہ ہے! تم میری طرف نظر بھر کر دیکھتے تو سہی، میں خود کو تمہارے لیے سر تا پا بدل دیتی، میں اپنی ساری فضول سرگرمیاں چھوڑ دیتی۔ تم کیا جانو شاہ زیب، میں یہ سب تو اپنے پیارے بابا جانی کی وجہ سے کرتی ہوں، میں نہیں چاہتی کہ مجھے افسردہ دیکھ کر وہ دکھی ہوں، میں تو ان کی خاطر ہنستی ہوں، انہیں خوش کرنے کو اوٹ پٹانگ حرکتیں کرتی ہوں۔ بابا جانی جو ماما جانی کے جانے سے اکیلے ہو گئے، میں ان کی تنہائی کو اپنی شوخیوں سے، اپنی شرارتوں سے بانٹنے کی کوشش کرتی ہوں، تم اس مسکراہٹ کی قیمت کیا جانو جو ہماری وجہ سے کسی دوسرے کے چہرے پر آتی ہے۔” آبگینہ سوچ سوچ کر پاگل ہو رہی تھی۔ “تم شاہ زیب حسن انکار کرتے مگر یوں میری ذات کی تذلیل تو نہ کرتے، تم نے تو میرے دل کو ریزہ ریزہ کر دیا ہے مگر نہیں شاہ زیب حسن، میں تمہیں اپنے پندار سے کھیلنے کی اجازت نہیں دوں گی، قبل اس کے کہ تمہارا انکار دادو تک پہنچے، میں خود دادو سے جا کر انکار کر دوں گی، کہہ دوں گی میں ان سے کہ میں تم سے نفرت کرتی ہوں، شدید نفرت۔” کہتے کہتے وہ رو پڑی اور پھر روتی چلی گئی۔

نیچے دیے گئے 4 ڈاؤنلوڈ لنکس میں سے 3 لنکس پر اشتہار آ سکتا ہے، جبکہ 1 لنک اصل ڈاؤن لوڈ لنک ہے۔

ہماری درخواست ہے کہ کسی بھی لنک کو بند کیے بغیر تھوڑا صبر سے استعمال کریں۔

آپ کی یہی چھوٹی سی سپورٹ ہمیں مزید ناول آپ تک پہنچانے میں مدد دیتی ہے