Safar Hi Tamam Rah Main Hai by Nighat Abdullah is an emotional Urdu novel based on feudal traditions, women empowerment, emotional romance, and family conflicts.

حویلی سے بابا سائیں کا بلاوا آ گیا۔ وہ اسی شام امی، اباجی اور بھائی کے ساتھ حویلی آ گئی تھی۔ یہاں خاص گہما گہمی تھی۔ کسی تقریب کا سماں تھا اور ابھی وہ آ کر ہال کمرے میں کھڑے ہی ہوئے تھے کہ اماں جی کے اشارے پر فرناز اس کا ہاتھ پکڑ کر اوپر لے گئی۔ پھر پلنگ پر دھکا دیتے ہوئے شرارت سے بولی تھی “تمھاری شادی ہو رہی ہے۔“ “کیا؟” وہ اپنی جگہ سے اچھل گئی تھی۔ “سچ کہہ رہی ہوں۔“ “لیکن ابھی تو میں۔۔۔” بابا سائیں کو آتے دیکھ کر اس کی بات ہونٹوں میں رہ گئی اور اپنی جگہ سے کھڑی ہو کر اُس نے سر جھکا لیا۔ تب بابا سائیں نے فرناز کو جانے کا اشارہ کیا پھر اُس سے کہنے لگے “مجھے معلوم ہے، ابھی تمھیں پڑھنا ہے۔ اسی لیے ابھی صرف تمھارا نکاح کر رہا ہوں۔ پھر زوار شاہ بھی ابھی کچھ لاابالی سا ہے۔ اُسے ذمہ داریوں کا احساس کرنے اور سمجھنے میں وقت لگے گا اور جب تک وہ زمینوں جائیدادوں کا حساب سمجھنے کے قابل ہو تب تک تم پڑھ سکتی ہو۔” اُسے سچ مچ افسوس ہوا کہ بابا سائیں نے اس کا اعتبار نہیں کیا، یا پھر اُسے آزمانا چاہتے تھے جو پوچھنے لگے: “تمھیں کوئی اعتراض تو نہیں ہے؟” “نہیں۔” اُس نے بہت آہستہ سے جواب دیا اور اُن کے جاتے ہی پلنگ پر ڈھے گئی تھی۔ زوار شاہ اس کی بڑی پھوپھو کا بیٹا تھا۔ چھ فٹ کا لمبا چوڑا جوان، اگر وہ کوئی عام سی لڑکی ہوتی تو اس کی آمد پر جھروکوں سے جھانکا کرتی اور اب اُس سے نسبت ٹھہرنے پر تو گویا دلی مراد بر آتی، لیکن اُس پر تو بس پھوپھو مہر النساء کی طرح ڈاکٹر بننے کی دھن سوار تھی۔ اس کے علاوہ کسی بات میں کشش نظر نہیں آتی تھی۔ بہرحال اُس روز نہ صرف اس کا اور زوار شاہ کا نکاح ہوا بلکہ بدلے میں زوار شاہ کی بہن سمیرا کو اس کے بھائی شہباز لالا سے منسوب کیا گیا اور اُس وقت تو اُس نے اس بات کو کوئی اہمیت نہیں دی تھی بلکہ یہی سوچا تھا کہ اچھا ہے وہ بابا سائیں کے سامنے سرخرو ہو گئی۔وہ رخصت ہوئی تو سمیرا بھابھی اس کے ساتھ آئی تھیں۔ وہی اُسے حجلۂ عروسی میں چھوڑ گئی تھیں۔ تنہا ہوتے ہی اُس نے اپنی دکھتی ہوئی گردن کو ذرا سا اونچا کیا جو جھکانے سے اکڑ گی تھی ۔ابھی تو وہ ہر احساس سے عاری تھی، اس کے باوجود اندر کہیں ایک فطری سا احساس تھا کہ زوار شاہ اس کے حسن سے نہ سہی، تعلیم سے تو مرغوب ہوگا ہی اور وہ کوئی معمولی پڑھی لکھی بھی نہیں تھی، ڈاکٹر بن چکی تھی اور اسی احساس میں گھر کر وہ آئندہ کے بارے میں سوچ رہی تھی کہ زوار شاہ آ گیا۔ اُس نے کن اکھیوں سے دیکھا، وہ سر پر سے بڑا سا شملہ اتار کر ٹیبل پر رکھ رہا تھا، پھر اُس کے برابر یوں لیٹا جیسے میلوں مسافت طے کر کے آ رہا ہو اور اپنے مخصوص اکھڑ لہجے میں بولا “مجھے چادر اڑھا دو۔” “جی؟” اس نے یونہی بے دھیانی میں دیکھا تو وہ خواہ مخواہ تپ کر بولا: “اونچا سنتی ہو کیا؟ مجھے چادر اڑھاؤ۔” اُس نے بیڈ پر اور ادھر ادھر دیکھا، کہیں کوئی چادر نہیں تھی۔ تب بیڈ سے اتر کر پوچھنے لگی: “کہاں ہے چادر؟” “بکس میں دیکھو۔” اس کی سمجھ میں نہیں آیا وہ آتے ہی رعب کیوں جھاڑنے لگا۔ چپ چاپ کونے میں رکھا بڑا بکس کھول کر چادر نکالی، پھر اُسے اوڑھاتے ہوئے اپنے تئیں ہمدردی سے پوچھا: “آپ کی طبیعت تو ٹھیک ہے ناں؟” “کیا مطلب؟” وہ ایک جھٹکے سے اٹھ کر بیٹھ گیا۔ “کیا میں تمھیں بیمار نظر آ رہا ہوں؟” “نہیں۔” وہ سچ مچ سمجھ میں نہیں آیا کیا کہے اور وہ جیسے ادھار کھائے بیٹھا تھا۔ “سمجھ گیا، اپنی ڈاکٹری کا رعب جمانا چاہتی ہو۔ لو دیکھو میری نبض۔” اُس نے اپنی کلائی آگے بڑھائی اور وہ بے اختیار دو قدم پیچھے ہٹ گئی۔ تب وہ اس کا تمسخر اڑانے لگا: “یہ تم ڈاکٹر ہو؟ مریض ہاتھ دکھا رہا ہے اور تم بھاگ رہی ہو۔ چلو ادھر آ کر دیکھو کیا تکلیف ہے مجھے۔” وہ اس کے کہنے پر آگے آئی اور اس کی نبض پر ہاتھ رکھنا چاہتی تھی کہ اس سے پہلے ہی اُس نے کلائی تھام لی اور زور سے جھٹکا دے کر اسے اپنے برابر گرا لیا۔ حد تھی بدتمیزی اور وحشی پن کی۔ اُس نے کم از کم ایسا تصور کبھی نہیں کیا تھا۔ اتنا تو جانتی تھی کہ وہ اجڈ اور بدتمیز ہے لیکن یہ گمان میں بھی نہیں تھا کہ اُس کے ساتھ اس طرح بدتمیزی سے پیش آئے گا۔ وقت ایسے ہی گزرتا گیا شادی کو ایک سال ہونے والا تھا ۔۔ وہ زوار شاہ کی لاتلقی برداشت کرتی رہی ۔لیکن وہ ایک ڈاکٹر تھی کیسے گاؤں کے لوگوں کو یوں بیمار دیکھ سکتی تھی ۔۔ایک دن اس نے حوصلہ کرکے زوار شاہ کو کہہ ہی دیا “زوار شاہ! آپ مجھے یہاں ایک چھوٹا موٹا ہاسپٹل بنوا کر تو دے ہی سکتے ہو۔” اُس نے ابھی اس قدر کہا تھا کہ وہ کڑک کر بولا “کیوں؟ اسپتال کی کیا ضرورت ہے؟” “ضرورت ہے اس لیے کہ یہاں علاج معالجے کی کوئی سہولت موجود نہیں ہے۔” “تمھیں کیا فکر؟ تم بیمار پڑو گی تو شہر سے ڈاکٹر آ جائے گا۔” “میں صرف اپنی بات نہیں کر رہی زوار شاہ! جن لوگوں کو تم اپنی رعایا کہتے ہو، اُن کی بات کر رہی ہوں۔” وہ حتی الامکان بہت آرام سے بات کر رہی تھی۔ “یہ لوگ جو ہمارے ٹکڑوں پر پلتے ہیں، ان کے لیے اسپتال بنوا دوں؟ پھر کہو گی ان کے لیے گھر کھڑے کر دو، اس کے بعد زمینوں کا حساب کتاب اُن کے ہاتھوں میں دے کر ہم بیٹھے منہ دیکھا کریں۔” “تم خواہ مخواہ بات بڑھا رہے ہو۔” وہ رسان سے بولی، “میں نے ہاسپٹل بھی اپنے لیے بنوانے کے لیے کہا ہے۔ دوسرے لوگ تو ظاہر ہے وہاں علاج کے لیے آئیں گے اور اس طرح اسپتال ان کی جاگیر نہیں ہو جائے گا۔” “تمھارے لیے اسپتال بنوا دوں؟ یعنی تم۔۔۔” وہ جیسے اب سمجھا اور ایسے لڑاکا تیوروں سے اُسے دیکھنے لگا جیسے پتا نہیں اُس نے کیا کہہ دیا ہے، اور وہ اندر ہی اندر سہم گئی تھی۔ بظاہر اسی سکون سے بولی “ہاں، مجھے اپنی تعلیم کا مصرف چاہیے۔” “بکواس مت کرو!” وہ غضبناک ہو کر دھاڑا۔ “بھول جاؤ، جیسے یہاں دوسری عورتیں رہتی ہیں ویسے رہو۔” “میں اُسی طرح رہ رہی ہوں زوار شاہ! لیکن میں اپنے اتنے سالوں کی محنت اور کاوشوں کو بھول نہیں سکتی۔” “لیکن یہ خیال ہی دل سے نکال دو کہ میں کبھی تمھیں کام کرنے کی اجازت دوں گا، ہرگز نہیں!” پھر طنز آمیز لہجے میں بولا: “بڑا علاج کرنے کا شوق ہے تو اپنا علاج کرو! سال ہو گیا شادی کو اور ابھی تک گود خالی ہے۔” “زوار شاہ!” وہ سناٹے میں آ گئی۔ “ٹھیک تو کہہ رہا ہوں۔ بڑی آئی کہیں سے ڈاکٹرنی بن کے، ہونہہ!” وہ اپنا شملہ ٹھیک کرتا نکل گیا اور وہ کتنی دیر تک وہیں بیٹھی رہی تھی۔