Forced marriage, one-sided love aur dil ko chhoo lene wali emotional Urdu novel.

اتنی دیر لگا دی آپ نے؟” اس نے کہا۔ وہ چپ چاپ گاڑی لاک کرتا رہا۔
“میں تو پریشان ہی ہو گئی تھی۔” وہ اس کے پیچھے پیچھے چلتی ہوئی بولی۔
“کیوں؟” وہ یکدم پلٹا۔ “کیا ضرورت تھی پریشان ہونے کی؟ میں مر گیا تھا کیا؟ یا بندھا ہوا ہوں میں تم سے؟ جب میری مرضی ہوگی تب آؤں گا اور مرضی ہوگی تو نہیں بھی آؤں گا۔ تم کو ضرورت نہیں ہے پریشان ہونے کی، تمہاری اپنی ذات ہی کافی ہے دوسرے کے لیے پریشانیاں اور خواریاں پیدا کرنے کے لیے۔” وہ دھم دھم کرتا ہوا اپنے کمرے میں چلا گیا۔
وہ دم بخود کھڑی رہ گئی۔ بھلا اس نے کیا کیا تھا اور کیا کہا تھا جس پر وہ یہ سب کچھ سنا کر چلا گیا تھا؟ اور اس کی ذات سے اس کو کون سی پریشانیاں لاحق ہوئی تھیں؟ اس نے تو کبھی بھول کر بھی اس سے کچھ نہیں مانگا تھا، کوئی سوال نہ کیا تھا۔
اس نے تو کبھی خواب میں بھی خدا سے ایسے شہزادے کو پانے کا تقاضا نہ کیا تھا۔ اس کی خواہشیں، اس کی وفائیں ہمیشہ ہی بہت محدود رہی تھیں، پھر اس کو کس بات کی سزا مل رہی تھی۔
وہ خوش نہیں ہیں میرے ساتھ،” اس نے روتے روتے سوچا۔ “شاید وہ کسی اور کو چاہتے ہوں گے۔ خالہ نے زبردستی پکڑ کر مجھ سے بیاہ دیا، میری وجہ سے وہ پریشان رہتے ہیں۔ بھلا مجھ جیسی جاہل، گنوار، ان پڑھ لڑکی کا ان سے کیا جوڑ تھا؟ وہ اتنے خوبصورت، اتنے شاندار پڑھے لکھے اور میں کالی، بد رنگ اور بالکل بے عقل۔” وہ روتی رہ گئی۔ “خالہ! تم نے اچھا نہیں کیا اپنے بیٹے کے ساتھ۔ میں انہیں افسردہ نہیں دیکھ سکتی۔ وہ مجھ سے نفرت کرتے ہیں تو بے شک کریں، میں تو ہوں ہی ایسی، لیکن میں تو ان کو چاہتی ہوں نا، بھلا میں کیسے انہیں پریشان دیکھوں؟ میں چلی جاؤں گی، گاؤں واپس چلی جاؤں گی، اتنے دن ان کے ساتھ رہی تو اسی لیے کہ ان سے محبت ہے، ان کو چھوڑ نہیں سکتی تھی اور اب جاؤں گی بھی تو اسی لیے کہ ان سے محبت ہے، اس لیے انہیں پریشان نہیں دیکھ سکتی۔ حیدر! میں چلی جاؤں گی، جہاں سے آئی تھی وہیں، ہمیشہ کے لیے۔”