“رہنے دو اسماء! اب یہ اتنا بڑا ہو گیا ہے کہ مجھے آنکھیں دکھا سکے۔” دادا جان دل گیر لہجے میں بولے تھے۔ ایک لمحے کو وہ ندامت میں گھر گیا۔ “میرا قصور بس اتنا ہی تو ہے کہ اپنی یتیم نواسی کو مناسب ٹھکانا دینے کے لیے۔۔۔۔۔” “جی ہاں، اپنی اس یتیم نواسی کا بہت خیال تھا نا آپ کو، اس یتیم پوتے سے کوئی محبت نہ تھی آپ کو جو قربانی کا بکرا بنا کر اپنی اس یتیم و مسکین نواسی کو۔۔۔۔” غصے میں اس کی آواز خاصی اونچی ہو گئی تھی۔ اماں جی اپنے کمرے سے افتان و خیزان برآمد ہوئیں۔ “اے ہے کیا ہو گیا بیٹا۔۔۔۔؟” بیٹے صاحب دھڑ دھڑ سیڑھیاں چڑھتے اور غائب ہو گئے۔ جانتے تھے، اب سب مل کر انہیں گھیر لیں گے اور وہ کچھ بھی نہ بول پائیں گے۔ “دیکھا، دیکھا تم نے اسماء! کیا سلوک کرنے لگا ہے۔۔۔۔یہ ہمارے ساتھ کیا برا کیا ہے ہم نے، اتنی اچھی لڑکی ہے ، کم عمر، خوب صورت، پڑھی لکھی، جس طرح چاہے اپنے رنگ میں ڈھال لے۔ مگر یہ تو بے نتھے بیل کی طرح ہاتھ ہی نہیں آتا۔” اماں جی متفکری سے کہہ رہی تھیں۔ اسماء شرمندہ سی ہو گئی۔ “کل شادی ہے۔ ہنی کے دودھیال والے بھی آئیں گے۔ اس کے یہی تیور رہے تو کیا سوچیں گے وہ لوگ۔” “اماں جی! آپ فکر مت کریں۔ میں سمجھاتی ہوں اسے۔” “اچھی طرح سمجھا دینا۔ کل اس نے کوئی گڑبڑ کی۔ تو بھری بارات میں گولی مار دوں گا۔” بابا جان طیش میں آکر بولے۔ “آپ کو زحمت نہیں دیں گے۔ یہ مبارک کام میں خود ہی کر لوں گا۔ آپ اپنی یتیم نواسی کی خیر منائیں۔۔۔۔” ۔۔۔۔۔۔۔۔۔۔۔۔۔۔۔۔ اس نے دھیرے سے ساتھ والے دروازے پر دستک دی۔ “کون ہے؟” اس نے آہستگی سے دروازہ کھولا اور اندر داخل ہو گیا۔ وہ ذرا سا جھکی پاؤں کی سائیڈ پر بنی مہندی کی بیل ٹھیک کر رہی تھی۔ سر اٹھا کر اس نے آنے والے کو دیکھا۔ پھر سراسیمگی میں کھڑی ہو گئی۔ “آ۔۔۔ آپ!” وہ یونہی دونوں ہاتھ پشت پر باندھے اسے گھورے گیا۔ “ک۔۔۔ کیا ہوا؟” وہ ہکلائی۔ “سنو۔” وہ سنگین و سنجیدہ لہجے میں کہتا اس کے قریب آیا۔ “تمہارے پاس بس آج کی رات ہے۔” “ک۔۔۔ کیا مطلب۔” ہنی کی ٹانگیں ایک دم بے جان ہوئی تھیں۔ دھم سے بیڈ پر بیٹھ کر ہراساں نگاہوں سے اسے دیکھنے لگی۔ “میرا کچھ نہیں جائے گا حنا بی بی! تمہاری زندگی عذاب ہو جائے گی۔ میں تمہیں کبھی کوئی خوشی نہیں دے پاؤں گا۔ بہتر یہی ہے کہ تم آج اور ابھی انکار کر دو۔” اس کے حد درجے سنجیدہ و کٹھور لہجے پر حنا نے بمشکل تھوک نگلا تھا۔ “م۔۔۔ میں۔” “ہاں تم۔” “م۔۔۔ میں نے انکار کیا تھا۔” “پھر۔” وہ بری طرح چونکا۔ گویا لڑکی اتنی بھی معصوم نہیں۔ جتنا وہ سمجھا تھا۔ “بابا جان کہنے لگے۔ اس کو یونہی بولنے دو۔ شادی کے بعد سب ٹھیک ہو جائے گا۔ ارمغان تو یونہی بکواس۔۔۔۔” مہندی لگا ہاتھ ہونٹوں پر رکھ کر اس نے ایک دم بات روکی۔ پھر سہمی نگاہوں سے اسے دیکھنے لگی۔ “بکواس، میں بکواس کرتا ہوں۔” ارمغان کی نگاہیں ایک دم لہو رنگ ہوئی تھیں۔ “میں نے تو۔۔۔۔” “بس ٹھیک ہے کل آنے دو۔ پھر پتا چلے گا سب کو کہ میں بکواس کرتا تھا یا نہیں اور تم۔۔۔۔ تمہیں بھی مزا آجائے گا۔ بہت شوق ہے نا شادی کا۔” “مجھے کوئی شوق نہیں ہے آپ سے شادی کا۔ آپ کو جو کہنا ہے بابا جان سے کہیں۔ مجھے کیوں تنگ کر رہے ہیں۔” وہ ایک دم رودی تھی۔ “چپ۔” وہ زور سے دھاڑا۔۔