میرا اور تمہارا نکاح صرف کاغذ کی حد تک ہے، اس سے زیادہ کی تم امید بھی مت رکھنا۔” اس نے انگلی اٹھا کر خشمگیں نگاہوں سے گھورتے ہوئے اسے اوقات یاد دلا دی۔ تذلیل کے احساس نے اسے یوں جکڑا کہ لگا کہ اگر سانس بھی لی تو ٹکڑوں کی شکل میں زمین بوس ہو جائے گی۔ اس نے تمام جائیداد فروخت کر کے رقم ورشا کے حوالے کر دی۔ “اس پر صرف اور صرف تمہارا حق ہے، تمہاری مرضی ہے تم جیسا چاہو اسے استعمال میں لاؤ۔” یہ کہہ کر فاز نے اس کی گود میں رقم ڈال دی اور فریج سے پانی نکال کر پینے لگا۔ “اتنی بڑی رقم کی میں حفاظت نہیں کر سکوں گی۔ بہتر ہوتا اگر آپ اسے اپنے پاس رکھ لیتے، جب مجھے ضرورت ہوتی میں آپ سے لے لوں گی۔” فاز نے ہاتھ میں پکڑا گلاس فریج پر رکھا اور دونوں ہاتھ جینز کی جیب میں ڈال کر اس کے مقابل آن کھڑا ہوا۔ “ہاں، کہہ تو تم ٹھیک رہی ہو۔ جو لڑکی اپنی عزت کی حفاظت نہ کر سکے، وہ کاغذ کے ان ٹکڑوں کی حفاظت کیا کر سکے گی۔ وہ ابھی بات کر رہا تھا کہ صفیہ بیگم روتی ہوئی کمرے میں آئی۔۔ ”کیا ہوا امی، کیوں رو رہی ہیں؟“ اندر آتی ماں کو دیکھ کر فاز بولتے رک گیا۔ ”ارے پتہ نہیں کس کا گندہ خون ہے یہ۔ اگر صمد کی بیٹی ہوتی تو یوں ہمارے مان کے ٹکڑے نہ کرتی۔ کہتی ہے جو رشتہ ارم کے لیے آیا تھا اور اب وہ میرے لیے کہہ رہے ہیں، انہیں ہاں کر دوں، میں وہاں شادی کروں گی۔ بتاؤ، ذرا بھی غیرت نہیں ہے اس میں۔“ اب کے صفیہ رو دیں، ”میری بچی کے ارمانوں پر دھول جھونک رہی ہے یہ۔“ فاز کے تن بدن میں چنگاریاں سی بھر گئیں، وہ ایک لمحے میں اس کے پاس جا پہنچا۔ ”مجھے تم سے اس قدر بے شرمی کی توقع نہ تھی۔ تم ایک گری ہوئی لڑکی ہو، واقعی میں ٹھیک سمجھا تھا تم ایک بدکردار لڑکی ہو، جو اپنے کسی عمل پر شرمندہ نہیں ہو سکتی۔“ اس نے آرام سے بیٹھی ہوئی ورشا کو دیکھ کر کہا۔ ”ظاہر ہے میں ساری زندگی آپ کے نام پر تو نہیں بیٹھی رہوں گی۔“ وہ اسی اطمینان سے بولی۔ ”مجھے بھی کوئی شوق نہیں ہے اپنے نام کے ساتھ تمہارا نام لگانے کا۔ لیکن اس طرح میری بہن کے خوابوں کو چکنا چور کرنے کا حق کس نے دیا ہے تمہیں؟ بولو جواب دو۔“ وہ اسے جھنجھوڑتے ہوئے بولا، ”تم اس وقت کا تو انتظار کر لیتیں جب میں تم سے ہر قسم کا تعلق ختم کر دیتا، اس کاغذ کے ٹکڑے کا ہی احترام کر لیتیں۔ لیکن تم گندی نالی کا کیڑا ہو، جو گندگی میں ہی ٹھیک رہتا ہے۔ جو لڑکی اپنی ہوس کی خاطر اپنی عزت کو مٹی میں ملا دے، اس سے بھلا اور کیا توقع کی جا سکتی ہے۔ واقعی مجھے تو تم صمد چچا کا خون بھی نہیں لگتیں، جانے کس…“ ”بس کریں خدا کے واسطے خاموش ہو جائیں! یوں میرے ماں باپ کو بدنام نہ کریں“ وہ بلک بلک کر رو پڑی