Taam e Ishq Novel21031 — Novelistan

Sneak

ابھی وہ جا کر اپنی ڈیسک پر بیٹھا ہی تھا کہ سامنے لگے کیمرے میں منظر دیکھ کر چونک گیا۔ اس کے دفتر کے باہر ایک لڑکی اندر آنے کے لیے منت سماجت کر رہی تھی، لیکن اس کا مینیجر اسے اندر نہیں آنے دے رہا تھا۔ اس نے انٹرکام پر مینیجر سے اسے اندر بھیجنے کو کہا تو ایک منٹ میں وہ لڑکی کمرے میں موجود تھی۔
سر پہ حجاب کیے، میک اپ سے مبرا سرخ و سفید چہرہ اور ذہانت سے بھرپور سیاہ آنکھیں جگمگا رہی تھیں۔
"یس مس، کیا چاہیے آپ کو؟" مرتضیٰ خاندادہ نے سپاٹ لہجے میں پوچھا۔
"میرا نام ہادیہ خان ہے اور سر، مجھے جاب کی ضرورت ہے۔ میں بہت اچھا کھانا بناتی ہوں۔ پلیز مجھے اپنے ہوٹل میں رکھ لیجیے۔ پتا ہے، میرے کھانے کو پورے خاندان میں پسند کیا جاتا تھا اور لوگ تو آ کر مجھ سے ریسیپی پوچھتے ہیں۔ پلیز سر، مجھے رکھ لیجیے۔ مجھے جاب کی سخت ضرورت ہے۔" وہ لب کشائی کرتے ہوئے بولی۔
"مس ہادیہ خان، کیا آپ سنجیدگی سے سمجھتی ہیں کہ آپ میرے سیون اسٹار ہوٹل کی شیف بنیں گی؟ آپ جانتی بھی ہیں کہ میرے ہوٹل کے شیف بڑے بڑے فائیو اسٹار ہوٹل میں کام کر چکے ہیں۔ اس کے علاوہ کئی بار وہ لوگ مختلف مقابلوں میں حصہ لے کر جیت بھی چکے ہیں اور مجھے جیتنے والے لوگ پسند ہیں۔ اسی لیے میں ایسے لوگوں کو ہی اپنے ہاں جگہ دیتا ہوں اور آپ گھر میں کھانا پکانے والی میرے ہوٹل میں کام کریں گی؟" وہ اٹھ کر کھڑا ہوتے ہوئے استہزائیہ انداز میں بولا۔
"سر پلیز، ایک موقع دے دیجیے۔" وہ جلدی سے اس کے سامنے ہوتے ہوئے بولی۔
"میرا اور اپنا وقت ضائع مت کیجیے۔ شاید آپ کے پاس بہت وقت ہوگا، مگر میرے پاس بالکل بھی وقت نہیں ہے۔ میرے فرانس سے کچھ گیسٹ آ رہے ہیں اور انہوں نے میرے ہوٹل کا کھانا ٹرائی کرنا ہے تو اسی لیے مجھے وہ سب دیکھنا ہے۔ سو پلیز، آپ جا سکتی ہیں۔" وہ دروازے کی طرف بڑھتے ہوئے بولا اور پھر باہر نکل گیا۔
"سر، مجھے بھی اپنے ساتھ کام کرنے کا موقع دیجیے نا۔ میں نے بہت ساری ریسیپیز ٹرائی کی ہیں اور بہت کچھ سیکھا ہے۔ میں نے نیٹ سے لیا ہے اور اس میں میں خود بھی اپنے تجربات کرتی رہتی ہوں جو کہ کافی کامیاب رہتے ہیں۔ پلیز سر، آج کے دن موقع دے دیجیے۔ ہو سکتا ہے آپ کے فرانس کے گیسٹ کو میرا کھانا پسند آ جائے۔" وہ اس کے پیچھے چلتے ہوئے تیز تیز لہجے میں بول رہی تھی۔
"مجھے لگتا ہے کہ آپ کا دماغ خراب ہو گیا ہے، مس۔ شاید آپ کو سمجھ نہیں آ رہی کہ میں نے آپ سے کہا ہے کہ آپ یہاں سے جا سکتی ہیں۔ اس سے پہلے کہ میں گارڈز کو بلا کر آپ کو یہاں سے نکالوں، آپ کے لیے بہتر ہے کہ آپ چپ چاپ یہاں سے تشریف لے جائیں۔" وہ بنا رکے سرد لہجے میں بولتا آگے بڑھ گیا۔
وہ وہاں کے کچن کے سامنے پڑے ہوئے بینچ پر بیٹھ گئی۔ مرتضیٰ کام کرتے ہوئے گاہے بگاہے اسی کو دیکھ رہا تھا جو کہ مسترد سی کبھی اٹھ کر ٹہلنے لگتی اور کبھی بیٹھ جاتی۔
"میٹھے میں گلاب جامن؟ واٹ دا ہیل! یہ کس نے ایڈ کیا ہے؟" وہ کھانے کی لسٹ دیکھتے دیکھتے ایک دم سے مڑتے ہوئے بولا۔
"سر، جو مینیو لسٹ بھیجی تھی، اس میں یہی تھا۔"
"او مائی گاڈ! جسٹ گلاب جامن؟ یہاں کوئی مٹھائی کی دکان ہے جو ہم یہ بنائیں گے؟ اس کے علاوہ ٹرائفل ہو سکتی ہے۔" وہ ناگواری سے بولا۔
"سر، یہ کسٹرڈ کے ساتھ انہوں نے کہا۔ انہوں نے کہا کہ انہوں نے شادی اٹینڈ کی تھی تو اس میں کسٹرڈ کے ساتھ یہ والے گلاب جامن تھے، تو اسی لیے یہ ساتھ رکھنے کو کہا ہے اور میں نے زیاد سے بول دیا ہے کہ وہ باہر سے گلاب جامن لے آئیں گے۔" اس کا شیف جلدی سے بولا۔
"دماغ خراب ہو گیا ہے تم لوگوں کا؟ تم لوگ اچھی طرح سے جانتے ہو کہ میں کبھی دھوکہ نہیں دیتا۔ ان سے جھوٹ بولوں گا میں؟" وہ تلخ لہجے میں بولا۔
"سر، آپ کو گلاب جامن نہیں بنانے آتے کیا؟" اس کے شیف نے جھجکتے ہوئے پوچھا۔
"ایسی ڈیمانڈ کبھی ہوئی نہیں اور میں نے یہ ٹرائی نہیں کیا، ورنہ کوئی اتنی مشکل چیز نہیں ہے۔ مگر مجھے حیرت تم لوگوں کے اوپر ہوتی ہے کہ تم لوگ اتنا چھوٹا چھوٹا کام نہیں سیکھ سکے۔" وہ سر جھٹک کر بیزاری سے بولا۔
"میں آپ کی مدد کر سکتی ہوں۔" پیچھے سے اسی لڑکی کی آواز آئی تو وہ ایک جھٹکے سے مڑ کر اسے دیکھنے لگا۔
"سچ میں کر سکتی ہوں۔ بہت اچھے بنیں گے۔ پلیز ایک موقع دے دیجیے۔" وہ جلدی سے پاس آ کر چمکتی آنکھوں سے بولی تو وہ ایک پل کے لیے جیسے مسمرائز ہو گیا۔
"اوکے، کتنی دیر میں بنا لو گی؟" اس نے گھڑی کی طرف دیکھتے ہوئے کہا۔
"پہلے تھوڑا سا آپ کو بنا کے دکھاتی ہوں نا اور پھر اس کے بعد آپ سب میری مدد کر دیجیے گا، اگر زیادہ چاہیے تو۔" وہ جلدی جلدی بولی۔
"نہیں، زیادہ نہیں۔ انہوں نے صرف کھانا ٹیسٹ کرنے آنا ہے اور پھر نیکسٹ ویک ان کا فنکشن ہے جس میں یہ سب کھانا شامل ہوگا۔" وہ بولا۔
"اوکے، نو پرابلم۔ آپ آدھا گھنٹہ دیجیے، میں بنا لوں گی۔" وہ ایکسائٹڈ انداز میں بولی اور پھر جلدی جلدی سے وہ اپنے ہاتھ چلانے لگی۔
سب لوگ اپنا کام چھوڑ کر دلچسپی سے گلاب جامن بنتے ہوئے دیکھ رہے تھے۔ پھر اس نے آدھے گھنٹے میں گلاب جامن بنائے اور اس کے سامنے باؤل میں ڈال کر رکھے تو وہ تھوک نگلتے انہیں دیکھنے لگا۔ اسے بچپن سے ہی مٹھائی جیسی چیزوں سے چڑ تھی۔
پھر اس نے پلیٹ میں نکال کر تھوڑا سا چکھا تو وہ کافی زیادہ مزیدار تھا۔ وہ کچھ دیر منہ ہلائے بغیر اس کے ذائقے کے بارے میں سوچتا رہا اور پھر اس کی طرف دیکھا جو کہ استفسار بھری نگاہوں سے اسی کے جواب کی منتظر تھی۔
"ہاں، اچھا بنا ہے نا؟"
ایک طرف دولت، غرور اور کامیابی کے نشے میں ڈوبا سیون اسٹار ہوٹل کا مالک مرتضیٰ خاندادہ، جس کے نزدیک صرف جیتنے والوں کی اہمیت تھی، اور دوسری طرف ایک عام سی حجاب پوش لڑکی ہادیہ خان، جس کے پاس نہ کسی بڑے ہوٹل کا تجربہ تھا، نہ کوئی سفارش، مگر اپنے ہنر پر بے پناہ یقین ضرور تھا۔
ایک معمولی سی نوکری کی تلاش اسے ایسے شخص کے سامنے لے آئی تھی جو اسے ایک موقع دینے کے لیے بھی تیار نہیں تھا۔ مگر پھر صرف آدھے گھنٹے میں بنائے گئے چند گلاب جامن نے وہ کر دکھایا جو اس کی منت سماجت بھی نہ کر سکی۔
اب سوال یہ تھا کہ کیا مرتضیٰ خاندادہ اپنے غرور کو ایک طرف رکھ کر ہادیہ کے ہنر کو تسلیم کر لے گا؟ کیا ایک عام سی لڑکی اس کے عالیشان ہوٹل میں اپنی جگہ بنا پائے گی؟ یا یہ پہلی ملاقات دونوں کی زندگی میں ایک ایسی کہانی کا آغاز ثابت ہوگی جس کا انجام کسی نے سوچا بھی نہ ہوگا؟
آخر کیا ہونے والا تھا جب ایک مغرور شخص کا سامنا ایک ایسی لڑکی سے ہوا جو ہار ماننا جانتی ہی نہیں تھی؟
جاننے کے لیے پڑھیے ایک دلچسپ اور تجسس سے بھرپور کہانی، جہاں ایک معمولی سی ملازمت کی تلاش دو بالکل مختلف دنیاؤں کو آمنے سامنے لے آئی تھی۔

Download Novel PDF

Read Novel Online

Description — Urdu

Summary — Urdu

Related Keywords