Ek dil ko chhoo lene wali kahani jahan ek sach poori zindagi badal deta hai.

“یہ آپ نے کیا کیا؟” وہ کوشش کے باوجود آواز میں سختی پیدا نہ کر سکی، نجانے احساسِ جرم تھا یا کوئی اور بات تھی۔
“یو لٹل فول! تم نے کیا سوچ کر میرے ساتھ کھیلنے کی کوشش کی؟” شہزیب کی آواز اتنی اونچی تھی کہ بہت سے لوگ ان کی طرف متوجہ ہو گئے۔ علی، دانی، زنیر اور سارہ پانی میں جاتے جاتے پلٹ آئے اور اب سب حیران نظروں سے البینہ کی طرف دیکھ کر سوچ رہے تھے کہ آخر اس سے کون سی خطا ہو گئی۔ البینہ کی سمجھ میں نہیں آ رہا تھا کیسے سب کی نظروں سے غائب ہو جائے، خوبصورت چہرے پہ تارا سی آنکھیں خوف سے پھیل گئیں۔
“شہزیب! آپ کو کوئی حق نہیں۔۔۔”
“شٹ اپ! وہ گرجا۔ تم دوسروں کے ٹکڑوں پہ پلنے والی چھوٹی سی حقیر لڑکی! تمہیں یہ جرات کیسے ہوئی تھی؟” وہ بھی کتنا بیوقوف تھا، آواز پہ کبھی غور ہی نہ کیا، حالانکہ تقریباً ایک سی آواز ہوتی تھی، اس نے سر جھٹکا۔
“شیزی ہوش میں آؤ، پلیز کول ڈاؤن” فراز نے آگے بڑھ کر اس کا ہاتھ پکڑ لیا۔ البینہ کا دماغ سائیں سائیں کر رہا تھا، نسیں یوں تن گئیں جیسے ابھی دماغ پھٹ جائے گا، اس نے ساکن ہوتی دھڑکنوں کو بمشکل سنبھالا۔ آنسوؤں کی دبیز دھند میں سب کے چہرے دھندلا گئے۔ وہ الٹے قدموں مڑی، ذرا سا لڑکھڑائی اور تیزی سے بھاگتی چلی گئی۔ فراز بھی تیزی سے اس کے پیچھے لپکا لیکن اتنی دیر میں وہ ایک ٹیکسی میں بیٹھ کر جا چکی تھی۔ وہ سست قدموں سے چلتا قریب آ گیا۔
“مجھے نہیں پتا تھا کہ تم اتنے چھوٹے دل کے ہو اور اتنی گھٹیا سوچ رکھتے ہو۔” اس نے حقارت سے شہزیب کی طرف دیکھا جو لہروں پہ نظریں جمائے لاپروا انداز میں کھڑا تھا۔ باقی سب حقیقت جاننے کی کوشش میں سوالیہ نظروں سے ایک دوسرے کی طرف دیکھ رہے تھے۔
البینہ نے ٹیکسی سے اتر کر ڈبڈباتی آنکھوں سے اپنے گھر کی طرف دیکھا، پھر کپکپاتے ہاتھوں سے پرس کھول کے پیسے ڈھونڈنے لگی۔ ذہن اتنا منتشر ہو رہا تھا کہ کچھ بھی سمجھ میں نہیں آ رہا تھا، اس نے پچاس کا نوٹ ڈرائیور کی طرف بڑھا دیا۔
“میرے پاس کھلا نہیں ہے صاحب۔”
“نہیں نہیں، مجھے کھلا نہیں چاہیے، تم لے جاؤ، سب لے جاؤ۔” البینہ بڑبڑائی اور تقریباً بھاگتی ہوئی نانو کے گھر میں داخل ہو گئی۔ نجانے سب کہاں تھے، وہ سیدھی ان کے کمرے میں گھس گئی۔ نانو چشمہ لگائے تسبیح پڑھ رہی تھیں، وہ بے دم سی ہو کر ان کے پاس گر گئی۔
“البینہ کیا ہوا میری بچی؟” انہوں نے گھبرا کر اس کا سر گود میں رکھ لیا۔
“نانو! میں کون ہوں؟ کس کی بیٹی ہوں؟” البینہ نے سر اٹھا کر بھرائی آواز میں پوچھا۔
“یہ بھی کوئی پوچھنے کی بات ہے، ظاہر ہے تم زینت کی بیٹی ہو” نانو پیار سے اس کے بال سنوارتی ہوئی بولیں۔
“چھوڑیں نانو یہ بہلاوے، آپ بتائیں میرے ماں باپ کہاں ہیں؟ میں ان پر اتنا بوجھ بن گئی تھی کہ انہوں نے مجھے مما کے حوالے کر دیا؟ خدا کے لیے نانو، اب کچھ مت چھپائیں” البینہ ایک جھٹکے سے بیٹھ گئی۔
“کس نے کہا تم سے یہ سب؟” نانو پریشان ہو گئیں۔
“جس نے بھی کہا ہو، آپ یہ بتائیں کہ یہ سچ ہے یا جھوٹ؟” البینہ کا رواں رواں دعا گو ہو گیا کہ کاش نانو کہہ دیں یہ سب جھوٹ ہے، اس نے ملتجی نظروں سے ان کی طرف دیکھا۔
“نہیں البینہ، یہ جھوٹ نہیں، لیکن اس کا مطلب یہ نہیں کہ تم ان پہ بوجھ تھیں، بلکہ زندگی تو ان کے لیے بوجھ بن گئی تھی، جب اس سے ہار گئے تو تمہیں فیاض نے لے لیا میری جان! یہ تقدیر کا فیصلہ ہے، زینت نے کبھی تمہیں محرومی کا احساس نہیں ہونے دیا” نانو نے محبت سے اسے بازوؤں میں لیا۔
“کاش نانو! آپ سب نے مجھے ان محبتوں کے جال میں نہ جکڑا ہوتا” اس نے نرمی سے خود کو نانو کے بازوؤں سے جدا کیا اور پھر لڑکھڑاتی ہوئی باہر نکل گئی۔
اوہ خدایا! اتنی توہین، اس وقت وہ مچل مچل کے رو رہی تھی، اندر اتنی گھٹن ہو رہی تھی کہ اسے یوں لگا جیسے ابھی دل دھڑکنا بند ہو جائے گا۔ شہزیب کے کہے ہوئے الفاظ ابھی تک اس کا تعاقب کر رہے تھے۔ “دوسروں کے ٹکڑوں پر پلنے والی حقیر لڑکی۔” کتنی حقیر تھی وہ، بھکاریوں کی طرح دوسروں پر بوجھ بنی رہی۔ کتنی تکلیف دہ بات تھی کہ یہ جو اتنے پیار سے رشتے اس کے گرد پھیلے ہوئے تھے، جن کے بغیر جینے کا وہ تصور بھی نہیں کر سکتی تھی، اس سے ان کا کوئی خونی رشتہ نہیں تھا، سب سراب ثابت ہوئے۔